الراحل يوسف شعبان ونبيله عبيد من كواليس كشف المستور
كتب/شريف بدر
استأذنك عشان اقفل الخلية اصلي مقدرش اسيبها مفتوحة اخاف عليكي من لدغ النحل .. فيه قعدة ظريفة هناك ياريت تستنيني فيها
=الحقيقة يا طلعت باشا لدغ النحل أهون كتير من لدغ البني آدمين
-شكلك جاية تتخانقي
=انا جيالك عشان تجيبلي حقي يا اخد حقي منك
-بس انا عمري ما كنت مديون لحد بأي حاجة
=ازاي وانت اللي غرقتني ، انت ناسي انك كنت الاستاذ الكبير بتاعنا ؟! ده انا لسه فاكرة كلامك واحنا بنات صغيرين في مدرستك مش انت اللي قلت لنا الوطن لما يحتاج يا بنات لازم ندي من غير حساب ؟! وزي ما فيه رجالة بتقدم ارواحها فدا الوطن فيه ستات كمان لازم تقدم اجسادها فدا الوطن وصدقناك وعرفنا الخليجي والطلياني والانجليزي والشامي والمغربي وعلى كل لون يا باتيستا
-اذا كنتي جاية علشان تحاكميني فاتفضلي من غير مطرود لأني حاكمت نفسي واصدرت الحكم
=وياترى حاكمت نفسك على كل حاجة ولا فيه حاجات فلتت منك ؟! اصل فيه ناس بتتعمد تنسى جرايمها
-انا حاكمت نفسي عن جرايم ارتكتبها حتى الاخطاء الصغيرة والمخالفات البسيطة اللي معملتهاش .. انا حاكمت نفسي لأني كنت حمار ، لما اكتشفت اني حمار حاكمت نفسي ولو كل الحمير اللي في البلد دي عملوا زيي هينشال من على كتافها هم تقيل اوي
=وياترى حكمت على نفسك بإيه ؟!
-زي ما انتي شايفة بعدت نفسي ، اللي يلاقي نفسه حمار لازم يبعد ، لكن بيني وبينك هو حكم صعب اوي ومفيش حمار يرضى بيه
=واشمعنا انت رضيت ؟!
-عشان عيب اوي اني اعيش عمري كله حمار ، اتولدت بني آدم ولازم اموت بني آدم عشان اقابل ربنا بالهيئة اللي خلقني بيها
كشف المستور … ١٩٩٤
تأليف : وحيد حامد ، اخراج : عاطف الطيب
