وحشني يا آبه بقلم كريمة الشقري

وحشني ياآبه .

 

بقلم الشاعرة / كريمة الشقري.

 

أنا أتولدت ياآبه لقيتك ساندني.. ومضلل عليا .

مشيت معاك سكتي وأيدك ياآبه ..مافارقت أيديا.

كنت أنت أبويا وأخويا وصاحبي.. وكل ما ليا .

وأبوس أيدك قصاد الناس ..وده ياآبه شرف ليا.

ولما أغيب عنك أحس دموعك.. تجري في عنيا.

ولما آجي بعد غياب يفرحني ياآبه.. شوقك ليا.

 

عمرك ياأبويا ما قلتلي شيئ.. ولاكلام يجرحني.

وكنت ليا الهنا والسعد ..وكنت دايماً مفرحني.

وكنت وياك أدوس على الدنيا.. ولا شيئ يخوفني.

ولما أقول ياآبه ألاقيك.. لمح البصر واقف في ضهري

ومرة واحدة ملحقتش.. ياأغلى الناس تودعني .

وعرفت إنه خلاص ماعدت.. ياقلبي تسمعني.

ياضهري ياآبه فراقك عني.. والله كاسرني.

 

لمين ياأبويا يا حبة عيني ..في الدنيا سايبني.

أنا تايهة ياآبه وبعدك عني.. والله واجعني.

ربتني على الأخلاق وده هوه.. إللي رافعني .

وعلمتني إن لو الدنيا مالت بيا ..علمي يعدلني.

علمتني كتير وعلمك والله.. ياآبه نافعني .

الله يرحمك ياآبه ويجزيك ربي.. الخير عني